Ég er nýr

Því að hver sá öðlast, sem biður, sá finnur, sem leitar, og fyrir þeim, sem á knýr, mun upp lokið verða. Matteusarguðspjall 7:8

Velkomin/n

Hvort sem þú íhugar að byrja að sækja kirkjuna eða vilt einfaldlega kynna þér málin, þá bjóðum við þig velkominn. Viljir þú hafa samband við okkur er síminn á safnaðarskrifstofu 535-4700 og netfangið filadelfia@filadelfia.is

Við viljum vera kirkja þar sem helst allir geta fundið sig heima. Þess vegna bjóðum við upp á starf fyrir ólíka hópa sem miðar að því að byggja upp gefandi samfélag þar sem trú fólks fær að eflast og vaxa.

Á sunnudögum kl. 11.00 er aðalsamkoma kirkjunnar og þar má segja að flestir hópar innan hennar komi saman. Ef þú ert að íhuga að koma í fyrsta skipti væri þetta eðlilegasti staðurinn til að byrja. Við reynum að bjóða alla velkomna án þess að vera yfirþyrmandi. Það er vel hægt að laumast inn og út án þess að tala við neinn en við vonum að þér verði hlýlega heilsað og helst að þú náir að kynnast einhverjum. Á þessum samkomum bjóðum við upp á barnastarf fyrir börn frá þriggja til tólf ára og túlkun fyrir enskumælandi.

Hvernig fara samkomur fram?

Á sunnudögum kl. 11.00 er aðalsamkoma kirkjunnar, þar má segja að flestir hópar hennar komi saman. Samkomuformið er frjálslegt og hentar flestum. Ekki er gerð krafa um sérstakan klæðaburð eða annað slíkt.

Sunnudagssamkomur eru yfirleitt 75-90 mínútur frá upphafi til enda. Þær einkennast alla jafna af söng, predikun og tækifæri til að fá fyrirbæn.

Fólki er að sjálfsögðu frjálst að velja sér sæti hvar sem er í salnum og enginn sæti eru frátekin.

Í byrjun er yfirleitt sungið í um það bil 10 til 15 mínútur, þá er gert hlé til að biðja fyrir bænarefnum, lesa stuttan Biblíutexta og tilkynningar fylgja í kjölfarið. Mjög oft eru tekin samskot um þetta leyti, en kirkjustarfið er fjármagnað með gjöfum meðlima og gesta. Það er alls engin krafa gerð um að fólk gefi, allra síst gestir eða þeir sem eru að koma í fyrsta skipti. Þér er frjálst að gefa eða láta baukinn bara ganga áfram, hvort tveggja er algjörlega frjálst.

Yfirleitt er sungið meðan samskotin eru tekin. Predikunin er 30-40 mínútur og fjallar um efni sem valið hefur verið fyrir þann dag. Oftast er tekið fyrir ákveðið efni sem fjallað er um í um það bil fjóra sunnudaga. Predikunin á að vera hagnýt, fjalla um málefni sem skiptir okkur máli og tengist daglegu lífi. Við viljum vanda undirbúningin svo að predikunin veki spurningar eða hugmyndir sem fylgja okkur inn í vikuna. Við leggjum mikla áherslu á að nota Biblíuna sem grunn í allar okkar predikanir, en einnig að tala um hana þannig að það sé ekki nauðsynlegt að hafa lesið hana til að predikunin nýtist. Ef löngun til að lesa hana vaknar við að hlusta á predikunina er það er það eitt merki þess að predikunin hafi verið góð.

Þegar predikunin er búin er þeim sem það vilja boðið að þiggja fyrirbæn meðan við syngum síðustu lögin. Fyrirbænin fer fram í minni samkomusal til hliðar við aðalsalinn. Að samkomu lokinni er öllum boðið að þiggja kaffi og mjög oft veitingar í kaffisal kirkjunnar á jarðhæðinni.

Hvernig fer Barnastarf kirkjunnar fram?

Barnastarfið miðast við krakka á aldrinum 3-12 ára og er aldursskipt.

Í barnastarfinu sem við í daglegu tali köllum "krakkafíló" er fjörugur söngur, oft með hreyfingum og dansi. Þau fá kennslan sem er sniðin að þeirra aldri og þörfum. Að kennslu lokinni vinna þau úr efninu á ólíkan hátt eftir aldri, eða leika sér, eftir því hvað á við.

Upplýsingaborð

Á miðhæð kirkjunnar er upplýsingaborð sem er alltaf opið eftir samkomur á sunnudögum.

Ef þú ert að koma í fyrsta skipti á samkomu hjá okkur bjóðum við þér að þiggja gjöf frá kirkjunni sem þú getur nálgast á upplýsingaborðinu.

Þar má einnig fá upplýsingar um hvað eina sem boðið er upp á í kirkjunni. Þar er hægt að skrá sig á námskeið og viðburði, gefa kost á sér í sjálfboðaliðastarf o.s.frv.

Félagslíf

Í kirkjunni er mjög fjölbreytt starf og allir ættu að finna eitthvað við sitt hæfi, hvort sem um námskeið eða hreint félagsstarf er að ræða.

Í kirkjunni er mikill fjöldi fólks allstaðar að úr samfélaginu og á öllum aldri. Algengt er að fólk myndi góð vináttusambönd við annað fólk í kirkjunni. Fjölbreytt starfsemi kirkjunnar skapar vettvang fyrir fólk að kynnast öðru fólki og mynda vináttutengsl.

Samfélagshópar eru starfræktir í kirkjunni, það eru fjölbreyttir hópar sem fólk í kirkjunni starfrækir, mjög oft á heimilum sínum. Hóparnir hittast oft hálfsmánaðarlega, sumir mánaðarlega, fjalla um kennsluefni úr kirkjunni með samtali, biðja saman og kynnast. Hægt er að óska eftir að komast í samfélagshóp gegnum skrifstofu kirkjunnar.

Geta allir orðið meðlimir í kirkjunni?

Fíladelfía er auðvitað kirkja og kirkjur eru grundvallaðar á trúarafstöðu. Við erum samfélag fólks sem vill fylgja Jesú og byggja líf sitt á grundvelli Biblíunnar sem við trúum að sé Guðs orð.

Við álítum alla sem eiga sömu trú og við vera hluta af hinni stóru kirkjufjölskyldu.

Án þess að gera lítið úr hefðum annara eða gefa á nokkurn hátt í skyn að aðrir séu minna kristnir, þá förum við fram á að þeir sem vilji tilheyra okkar kirkju hafi tekið niðurdýfingarskírn.

Við teljum það mjög skýrt í Biblíunni að þegar talað er um skírn sé það skref sem fólk velur sjálft eftir að það hefur eignast trú á Jesú Krist. Við trúum því ekki að skírnin geri okkur hólpin, þetta sé fyrst og fremst yfirlýsing um það sem hafi gerst í lífi hins trúaða og að viðkomandi vilji fylgja Jesú. Í Nýja Testamentinu taldist fólk hluti af kirkjunni eftir að það tók skírn, við viljum einfaldlega fylgja því fordæmi.

Það er ekki flókið að taka skírn, það er nóg að tala við prest eða skrifstofuna, áður en skírn á sér stað fer fram skírnarfræðsla sem er um 1 klukkustund, ef viðkomandi á trú og ætlar að fylgja Jesú er ekkert því til fyrirstöðu að fá skírn. Skírn fer yfirleitt fram á morgunsamkomunni, oftast eru nokkrir sem skírast saman.